2026 оны хоёрдугаар сарын 5-нд Улаанбаатар хотын захирагч Х.Нямбаатар, Монгол Улс дахь НҮБ-ын Хөгжлийн хөтөлбөрийн Суурин төлөөлөгч Матилда Димовска болон “Улаанбаатар хөрөнгө оруулалт, менежмент ҮЦК” ХХК-ийн гүйцэтгэх захирал Г.Гангамөрөн нар “Гэр хороололд сэргээгдэх эрчим хүчний шилжилтийг дэмжих зорилгоор амьжиргааг дэмжих төсөл”-ийг хэрэгжүүлэх санамж бичигт гарын үсэг зурлаа.
Төслийн хүрээнд нарны эрчим хүчний системийг батарей хуримтлууртай хослуулсан бичил сүлжээ (mini-grid) шийдлийг туршиж, гэр хорооллын 800 өрхийг төвлөрсөн цахилгаан сүлжээнд холбон, сэргээгдэх эрчим хүчээр халаах юм. Ингэснээр өрхүүдийг цэвэр, найдвартай эрчим хүчээр хангах нөхцөл бүрдэнэ.
Тодруулбал, 2.5 МВт хүчин чадалтай нарны бичил сүлжээ байгуулж, 800 өрхөд цахилгаан халаагуур суурилгана. Мөн батарей хуримтлууртай хосолсон, 80–1000 кВт хүчин чадалтай нарны хавтангуудыг ашиглах аж. Төслийг 2027 оны арванхоёрдугаар сард бүрэн хэрэгжүүлж дуусгахаар төлөвлөжээ.
Энэхүү төсөл нь Улаанбаатар хотын эрчим хүчний хэрэглээг цэвэр эх үүсвэрээр нэмэгдүүлэх, агаарын бохирдлыг бууруулах жишиг загвар болохоор зорьж байна.
