Хууль Зүй, Дотоод Хэргийн Яамнаас Газрын тухай хуульд нэмэлт, өөрчлөлт оруулах тухай хуулийн төслийг боловсруулж дууссан бөгөөд баригдаж дуусаагүй барилгын эрхийн бүртгэлийн асуудлыг зохицуулах зорилгоор холбогдох бусад хуульд өөрчлөлт оруулахаар ажиллаж байна. Тус хуулийн төсөл нь орон сууцны захиалгатай холбоотой луйвар, залилангийн гэмт хэрэгт хохирч буй иргэдийг хамгаалах, өмчийн эрхийг баталгаажуулах зорилготой юм.
Сүүлийн жилүүдэд орон сууцны захиалгыг давхардуулан авч бусдыг залилсан 2000 гаруй хэрэг бүртгэгдсэн бөгөөд арга хэлбэр нь улам нарийсаж байна. Мөн Шүүхийн шийдвэр гүйцэтгэх ажиллагаанд 304 хохирогчид холбогдох 15.1 тэрбум төгрөгийн үнийн дүн бүхий 94 гүйцэтгэх баримт бичиг бүртгэгджээ.
Хуулийн төсөл батлагдвал барилга эхлэх үеэс орон сууц, талбай бүр тодорхой дугаар, байршилтайгаар кадастр болон улсын бүртгэлийн мэдээллийн санд бүртгэгдэж, дуусаагүй барилгын бүртгэл үнэн зөв, нийтэд ил тод болж, орон сууц худалдан авагч иргэдийн өмчлөх эрхийн баталгаа бодитоор хангагдах эрх зүйн орчин бүрдэнэ. Хуулийн төслийг УИХ-ын хаврын чуулганаар өргөн мэдүүлж хэлэлцүүлэхээр бэлтгэж байна. Мөн олон нийтийн хэлэлцүүлэг 2026 оны 3 дугаар сарын 19-нд Хууль зүй, дотоод хэргийн яаманд болно. Иргэд, аж ахуйн нэгж, олон нийтийн төлөөллийг өргөнөөр оролцохыг урьж байна.
Хуулийн төсөлтэй ЭНД дарж танилцана уу.
