Лондонгийн металлын бирж дээр зэсийн үнэ энэ сарын 27-ны өглөөний байдлаар тонн нь 10,962 ам.долларт хүрлээ. Энэ нь өмнөх өдрөөс 1 орчим хувиар өссөн үзүүлэлттэй байна.
Зэсийн үнийн өсөлтөд БНХАУ болон АНУ-ын бодлогын өөрчлөлт гол нөлөө үзүүлжээ. Хятад Улс газрын ховор элементийн экспортын хязгаарлалтаа түр хугацаагаар зогсоох шийдвэр гаргасан нь зах зээлд итгэл нэмэгдүүлсэн бол АНУ зарим бүтээгдэхүүнд ногдуулж байсан өндөр татварыг бууруулах чиглэлд алхам хийсэн нь дэлхийн худалдаанд эерэг дохио өглөө.
Шинжээчдийн үзэж буйгаар, зэсийн үнэ ойрын хугацаанд 11,000 ам.доллар давж өсөх төлөвтэй байна. Цахилгаан автомашин, сэргээгдэх эрчим хүчний дэд бүтэц, батарей үйлдвэрлэл зэрэг салбаруудын эрэлт нэмэгдэх нь үүнд голлон нөлөөлөх хүлээлттэй байна.
