Сөүлд үл хөдлөх хөрөнгийн зах зээлийг хянах төрийн агентлаг байгуулна

БНСУ-ын эрх баригч Ардчилсан нам үл хөдлөх хөрөнгийн зах зээлийг хянах, салбар дахь шударга бус арилжаанд тавих хяналтыг чангатгах зорилгоор шинэ төрийн агентлаг байгуулах хуулийн төслийг өргөн барихаар боллоо.

Ерөнхий сайдын харьяанд ажиллах уг агентлаг нь шүүхийн зөвшөөрөлгүйгээр иргэдийн зээлийн мэдээлэл, санхүүгийн гүйлгээ, зээлийн байдлыг шалгах эрхтэй байх бөгөөд энэ үйл ажиллагааг агентлаг доторх тусдаа хяналтын зөвлөлөөр заавал хэлэлцүүлж, зөвшөөрөл авах зохицуулалттай юм.

Ардчилсан намын зүгээс энэхүү хуулийн төслийг зах зээлийн ил тод байдлыг хангах, иргэдийн орон сууцтай байх Үндсэн хуулиар олгогдсон эрхийг хамгаалахад чиглэсэн гэж тайлбарлалаа.

Мөн шалгалтын ажиллагааны үр нөлөөг нэмэгдүүлэх зорилгоор хяналтын байгууллагын албан хаагчдад тусгай шүүхийн цагдаагийн эрх олгох өөр нэг хуулийн төслийг тусад нь өргөн барихаар төлөвлөж байна.