Улаанбаатар хотын агаарын бохирдлыг бууруулах зорилгын хүрээнд нийслэлийн гэр хорооллын хоёр тарифт тоолууртай айл өрхийн шөнийн тарифыг тэглэх тогтоолыг Эрчим хүчний зохицуулах хорооноос гаргасан билээ. Шийдвэрийн дагуу уг хөнгөлөлтийг 2017 оны нэгдүгээр сарын 01-ээс дөрөвдүгээр сарын 01-ний өдрийг хүртэл үргэлжлүүлэх юм.
Оройны 21 цагаас өглөөний 06 цаг хүртэл цахилгаан эрчим хүчийг үнэ төлбөргүй ашиглах энэхүү хөнгөлөлтөд гэр хорооллын 146,000 айл өрх хамрагдаж байгаа юм. Ингэснээр одоогийн хэрэглээгээр нь тооцож үзвэл иргэд 4.8 тэрбум төгрөгийн хөнгөлөлт эдлэх юм байна. Хэрэглээ нь нэмэгдэх тусам түүнийг дагаад иргэдэд ирэх эдийн засгийн үр өгөөж нь өснө гэж мэргэжилтнүүд тооцоолж байгаа аж.
Энэхүү шөнийн тарифын хөнгөлөлттэй хугацаанд иргэдийн цахилгааны хэрэглээ огцом өсч болзошгүй тул аюулгүй байдлыг хангаж, эрсдэлээс сэргийлэх арга хэмжээнүүдийг "Улаанбаатар цахилгаан түгээх сүлжээ” ТӨХК удирдан ажиллах юм.
Эрчим хүчний зорицуулах хорооны хурлаас "Нийслэлийн гэр хорооллын айл өрхөд цахилгааны хөнгөлөлт үзүүлэх журам”-ын дагуу дамжуулах, түгээх сүлжээний хүчин чадал, техникийн боломжоос хамааруулан цахилгаан эрчим хүчний хэрэглээний дээд хязгаарыг 220В-ын хэрэглэгчид 700 кВт.ц, 380В-ын хэрэглэгчид 1500 кВт.ц байхаар тогтоожээ.
